作者：展奋
改写：叶又红
讲述：高仁
文字、语音审核：丁迪蒙
后期制作：高仁达
编辑：王乙其
朋友颜先生请我到德国波恩去白相，附加个激励机制居然是：我请侬吃德国大闸蟹！听下来个意思就是，德国个大闸蟹勿晓得要比阳澄湖个大闸蟹好吃多少。
原来当是勒德国吃大闸蟹是桩邪气奢侈、邪气潇洒个事体，想勿到却是以惊险开头个。
“迭个蟹，是莱茵河里向捞个伐”？朋友个房子就挨牢仔莱茵河，我想当然个问，啥人晓得，朋友头摇得像波拨浪鼓：呒没捕捞证，勒德国随便哪能勿好去捞个！
话音刚落，一群小人勒拉朋友儿子个带领下头冲进来了，颜先生看到大大个失态，居然像堵抢眼个英雄一样，“呼”个一声朝一大盆个大闸蟹扑上去，然后回头对仔儿子用上海闲话穷叫八叫：快点领伊拉出去！
儿子马上接翎子，呼隆隆、带仔人跑脱了，阿拉拨吓得一身冷汗，朋友豪扫解释：搿搭是悖论世界，黄鳝、甲鱼、大闸蟹一百样侪可以吃个，勿犯法，而且勿贵，大闸蟹每公斤也就是5到8欧元，不过只好吃死个，啥人勒海屋里向动刀，或者见血个，甚至是活货而宰杀未遂个，侪会有人去举报个。
我看了看“德国大闸蟹”，雌雄侪勒海3两左右，青褐色个背壳，肚皮勿哪能白，脚爪个毛也勿是金黄色，而是枯黄色个，卖相好像远远勿如阳澄湖，勿晓得味道哪能。
颜先生吃蟹勿欢喜煠欢喜蒸，讲迭能介原汁原味毫勿泄漏，但伊个调料勿敢恭维，认为有醋、漂个几根姜丝就可以了，家主婆看了大勿以为然，生姜拿过来，细细叫个剁成一大把姜末，摆到醋里去，再加重糖，马上旌旗飘扬。
讲起大闸蟹，拨欧洲商船个“压舱水”勒上世纪初带到欧洲，老早已经勿是新闻了。因为呒没天敌，结果变成功了灾害。
大家晓得，“吃”，侪是抑制物种个最佳手段，但是德国人叫伊死也勿吃大闸蟹，从最初个咬牙切齿个拨伊拉做成大量个饲料之外，到现在，德国一些渔业公司从易北河、莱茵河捕捞大闸蟹之后，“半公开”个供应中国移民家庭搭仔中国餐馆，勿能勿讲是个进步，而且，当然咾，德国个大闸蟹侪是野生个。
野生个口感无没闲话讲。首先是雄蟹个膏，粘稠而微甜，伊种香是沁人心脾个，就是阿拉三十年前头闻惯个蟹香，同样是人类个器官，我就想勿明白，为啥白种人个鼻头闻上去就是“腥气”呢？ 由此想到，阿拉宫廷谜语级个美味，啥个龙肝、凤髓、麇吭、豹胎、猩唇、熊掌……除脱仔熊掌基本侪是意淫之物。龙肝，据考证就是白牡马个肝脏。麇吭，就是小獐子个颈部肉，可以比猪头颈浪个肉更加鲜嫩？猩唇，更加是著名个吊诡食材，侬当是猩猩个嘴唇皮，其实不过是驼鹿面部个干制品而已，喻其珍贵，无非邪气少见罢了，啥地方及得上野生个蟹膏之万一呢？
雌蟹个“黄”当然也是腴美个，因为野生，蟹壳一剥开，蟹油居然立时三刻溢出来，好像比雄蟹更加香腻，讲句实话，吃迭种蟹而去蘸调料，葛真叫一个“巴”！搭吃鲥鱼刮鳞有啥两样呢。
李白《月下独酌》说：“蟹螯即金液，糟丘是蓬莱”。可见蟹肉邪气勿寻常，也许闻惯了大陆蟹个“药香”，阿拉对“金液”之美已经勿大习惯了，首先，是诧异蟹肉原来可以搿能个有弹性，一剥出来竟然还是笔挺个一字型，哪能可能像阿拉搿搭个蟹脚，肉一离壳就蔫脱了。其次，是甜，天然谷物个伊种轻微个“甜津津”，侬一上舌尖，就又拒绝调料了，觉着拨醋姜一熏，肉又糟踏了，唐代诗人唐彦谦有诗：一斗擘开红玉满，双螯咂出琼酥香。蟹黄不过是“红玉”，而蟹肉就是天上人间个“琼酥”了。我想，伊大概也是勿蘸调料个一族伐。
勒德国吃大闸蟹，只有一点遗憾：“环境比差”。决勿是勿卫生，更加勿是忒嘈杂，而是氛围违和，呒没几株疏竹斜影，呒没几声吴侬丝竹，没人搭你侬聊苏东坡“不到庐山辜负目，不食螃蟹辜负腹”个牢骚，更加没人搭侬聊李笠翁日积一文、以备买蟹个“养命钱”，就晓得吃。周围侪是黄油面包搭仔带血个牛排，侬会隐隐个觉着“蟹勿是搿能吃个”。 环境邪气重要。侬会觉着真正个吃货，勿应该只晓得呲好仔獠牙直奔刀镬。同理，时隔多日，我还是忘记勿了伊个一趟到乌镇去个强烈感受。
入夜个乌镇琼楼玉宇，火树银花，亭台飞红，水榭倒映，但是一路蹒跚，两旁个店家已经尽为各地商贾盘踞，晚炊里传出来个香味道勿是椒麻肉片、腊味合蒸、羊肉泡馍、就是腌臭鳜鱼、蒜子大肠、过桥米线；喇叭里传出来个音乐勿是“二人转”、“黄梅戏”就是“京韵大鼓”、“秦腔梆子”。
搿些侪老好个。侪有自家个味道。只是，看山已经勿是山。看水也勿是水了。乌镇已经呒没了自家个味道。
伊固然世界著名了，但再也勿是我梦里个乌镇了呀。
讲述：高仁
丁迪蒙
迪蒙，启迪蒙昧者也。上海市人。原上海大学中文系教师，多年来一直致力于沪语和海派文化的传承。沪语是吴方言的代表方言，是吴侬软语的典范。她既可以用来拉家常，也同样可以用来朗读各类诗歌散文。沪语完全可以书写，同粤语可以写作是一样的。本平台所有文章都是经过改写后，用沪语来演绎的，汉字书写也是正确的。
丁迪蒙所撰写的，与沪语相关的著作主要有：
《学说上海话》上海科技文献出版社
《听听说说上海话》少年儿童出版社
《实用沪语》复旦大学出版社
《上海话绕口令》少年儿童出版社
《上海方言词语使用手册》上海教育出版社
《上海话读成语故事》少年儿童出版社
《囡囡学童谣》少年儿童出版社
《囡囡学成语》少年儿童出版社
《海上风情》上海教育出版社
继续滑动看下一个轻触阅读原文
海上梦叠向上滑动看下一个
原标题：《德国大闸蟹》
阅读原文